Dr Dialektwettbewerb an de Schuala em Landkreis gat a!

Zum erschda Mal hat der Landkreis Günzburg in Kooperatio mit em Verei „Schwäbisch Literaturschloss Edelstetta“ an Dialektpreis ausglobat.

Ibral im boirischa schwätzat emmr weanigr Leit Dialekt. Und des obwohl so Dialekt a wichtigs Kulturgut isch, des für Identität vo onsrer Region und ihre Leit obandig viel Bedeutung hat. Deswega isch’s wichtig, dass onser Dialekt au sein Platz en de Schuala kriegt. Der Wettbewerb biatat d Meglichkeit, des Thema Dialekt und Mundart mit de Schialer en dr Schual mal a bissle besser azumgugga!

„Mit em Verei Schwäbischs Literaturschloss Edelstetten hand mir an engagierta Verfechter für Schwäbischa Mundart bei uns im Landkreis“ sait onser Landrat Dr. Hans Reichhart. Dr Verei isch erscht vor a baar Wucha mit em „Dialekpreis Bayern für Dialektvereine“ auszeichnet worda. Neaba em Vorstand vom Verei, Prof. Dr.  Klaus Wolf, werat au no die zwoi Schbrauchwissaschaftlerenna Dr. Edith Burkhart-Funk und Dr. Brigitte Schwarz Teil vo der Jury sei. Boide send für ihr Arbat au mit em „Dialektpreis Bayern“ auszeichnat worda.

Mitmacha defat alle Schialerena und Schialer aus alle Jaurgäng und alle Schualarta. Dia kennat alloi was macha oder au zu meaner mitnand. Egal isch au, ob’s was Gschriebanes isch oder au a Video oder gar a Podcascht. Wichtig isch bloß, dass es em Dialekt sei muas.

Weiterführende Informationen auf unserer Website